ഇഡ്ഡലി ഒരു സമീകൃത ആഹാരമാണ്

ഉത്തരാഖണ്ഡിൽ വിളഞ്ഞ ഉഴുന്നു പരിപ്പും
ഉസല്ലാം പെട്ടിയിൽ കൊയ്തെടുത്ത നീളൻ പച്ചരിയും
ഉമ്മയുടെ കൈകളിൽ എത്തിയതിനു പിന്നിൽ
ഉജ്ജ്വലമായ ഉപകഥകൾ ഒരു പാടുണ്ടാവാം

ഉരി  അരി ഉഴുന്നും ചേർത്തു വെള്ളത്തിലിടുമ്പോൾ
ഉമ്മ ഒന്നേ പടച്ച റബ്ബിനോട് പറഞ്ഞുള്ളൂ
ഉഗ്രൻ ഇഡ്ഡലിക്ക് വേണ്ട മാവാക്കാൻ കരുണയുണ്ടാകേണമേയെന്ന്
ഉഴുന്നു അരിയെ പുൽകിയതും പിന്നെ അലിഞൊന്നായതും
ഉമ്മ ഒരേ നിർവികാരതയോടെ കണ്ടു നിന്നു

ഉഴുന്നിനു അരിയോട് പ്രണയമില്ലാതിരുന്നിട്ടും അവരൊന്നായി
ഉദാത്തമായ പല പ്രഗത്ഭ ജന്മങ്ങൾക്കും പിന്നിൽ
ഉപ്പിനോളം പോലും പ്രണയമില്ലാത്ത കൂടിച്ചേരലുകളായിരുന്നിരിക്കാം
ഉപ്പയോട്‌ ഉമ്മയ്ക്കുണ്ടായിരുന്നതും
ഉഴുന്നിനു അരിയോടുണ്ടായ പോലൊരു നിർബന്ധിത പ്രണയമായിരുന്നിരിക്കണം

മാവ് വെന്ത മണമടിച്ച ആവി വന്നപ്പോൾ
ഉമ്മ ടീസ്പൂണിന്റെ മോന്തായം കൊണ്ടു കുത്തിയിട്ട
ഇഡ്ഡലികൾ ഞങ്ങളെപ്പോലെയായിരുന്നു
പ്രണയമില്ലാതിരുന്നിട്ടും പ്രകൃതിയൊരുക്കിയ മിശ്രിതം പോലെ
പതപ്പും മാർദ്ദവുമുള്ള രസികൻ ഇഡ്ഡലികൾ

ഇഡ്ഡലികൾ ഉണ്ടാകുന്നതിങ്ങനെയാണ്
അവയ്ക്കു ചേർക്കപ്പെടേണ്ട മിശ്രിതം
കൃത്യമായ അനുപാതത്തിൽ ചേരണം
ഇഡ്ഡലി ഒരു സമീകൃത ആഹാരമാണ്
ഞാൻ പൂർണനായിരിക്കുന്നതു പോലെ
 

വായിച്ചാൽ കിളി പോകുന്ന കവിത

അമ്മുമ്മ നിധിപോലെ കാത്ത ട്രങ്ക് പെട്ടി മൊത്തം പരതി അച്ഛന്റെ പാണ്ടി ബാഗ് കുടഞ്ഞിട്ടു നോക്കി ഒരു സാധനം വെച്ചാ വെച്ചിടത്ത് കാണില്ല നാശം അതല്ലേലും അങ്ങനാണല്ലോ ന്യൂട്ടൺ മാങ്ങ പറിച്ച കഥയറിയാമോ ന്യുട്ടെല്ലാ ഉണ്ടാക്കുന്നത്‌ ചളിയിൽ നിന്നാണത്രേ കട്ടച്ചളി എവിടെകിട്ടിയാലും ഒന്ന് പറയണേ കൃത്യമായിട്ട്‌ ഒരു സംഗതി ഉണ്ടാക്കാനാ എന്നതാട നിനക്കൊരു എരിപിരി സഞ്ചാരം ഏനക്കേട് പിടിച്ച കാലമാ ഒരു ഞരമ്പിടറിയാ മതി ആശയം അസ്ഥി തുളച്ചു കയറാൻ നിൽക്കുമ്പോളാ അമ്മകുഞ്ഞമ്മേടെ അവരാതിച്ച കൊണവതിയാരം എനിക്ക് കവിത വേണം വായിച്ചാൽ കിളി പോകുന്ന എപ്പോഴുമെപ്പോഴും വേണമെന്നു തോന്നുന്ന കവിത ബലം പിടിക്കാതെ, വായിച്ചാൽ വയറ്റീന്നു പോകുന്ന ബുദ്ധിജീവികളെ ചിന്തിക്കാനും ബുദ്ധിയില്ലാത്തോരെ സംഗതി സ്പാറി എന്നും പറയിക്കുന്ന ഒരു കൊച്ചു ഗവിത സകല പുണ്യാളൻമ്മാരെ നീ ബുദ്ധിജീവികളെ കാത്തോളണീ ....